Мой сайт

Normativ-huquqiy hujjatlar loyihalari muhokamasi portalida Vazirlar Mahkamasining “Ruhiy buzilishlardan aziyat chekuvchi, shu jumladan, nogironligi bo‘lgan shaxslarning mehnat terapiyasi, yangi kasblarga o‘rgatish va ularni ishga joylashtirish uchun psixiatriya muassasalari hududida davlat-xususiy sheriklik shartlarida tashkil etiladigan davolash-ishlab chiqarish korxonalari to‘g‘risidagi nizomni tasdiqlash haqida”gi qarori loyihasi joylashtirildi.

Ruhiy buzilishlardan aziyat chekuvchi, shu jumladan, nogironligi bo‘lgan shaxslarning mehnat terapiyasi, yangi kasblarga o‘rgatish va ularni ishga joylashtirish uchun psixiatriya muassasalari hududida davlat-xususiy sheriklik shartlarida tashkil etiladigan davolash-ishlab chiqarish korxonalari to‘g‘risidagi nizomga ko‘ra, davlat-xususiy sheriklik quyidagi prinsiplarga asoslanadi:

davlat-xususiy sheriklik to‘g‘risidagi axborotning ochiqligi va qulayligi, bundan davlat sirini va qonun bilan qo‘riqlanadigan boshqa sirni tashkil qilgan ma'lumotlar mustasno;

kamsitishning yo‘qligi, bitim tomonlarining teng huquqliligi;

tomonlarning bitim bo‘yicha majburiyatlarni vijdonan bajarishi;

xavf-xatarlar va majburiyatlarning bitim tomonlari o‘rtasida adolatli taqsimlanishi;

davlat-xususiy sheriklik tomonlari o‘zaro munosabatlarining shartnomada kelishib olingan asosi.

Davlat-xususiy sheriklik shartlari asosida psixiatrik muassasalar hududida ruhiy buzilishlardan aziyat chekuvchi, shu jumladan, nogironligi bo‘lgan shaxslarning mehnat terapiyasi, yangi kasblarga o‘rgatish va ishga joylashtirish uchun DIChK tashkil etish istagini bildirgan xususiy sherik davlat sherigiga tegishli ariza beradi.

Arizada quyidagilar ko‘rsatilgan bo‘lishi kerak:

xususiy sherikning nomi va joylashgan yeri;

loyihani amalga oshirish maqsadi;

bitimning taxmin qilingan obekti yoki yer uchastkasi to‘g‘risidagi ma'lumotlar.

Xususiy sherikning davlat psixiatrik muassasalari bilan hamkorligi quyidagi maqsadlarga erishishni ta'minlashi zarur:

tibbiy-ijtimoiy reabilitatsiya sifatini oshirish hamda ruhiy buzilishlardan aziyat chekayotgan, jumladan, nogironligi bo‘lgan shaxslar resotsializatsiyasi uchun mehnat terapiyasidan foydalanish;

ruhiy buzilishlardan aziyat chekayotgan, jumladan, nogironligi bo‘lgan shaxslarni yangi kasblarga o‘rgatish va ishga joylashtirish;

davlat psixiatrik muassasalariga qarashli bo‘sh turgan inshootlar, jihozlar, yer maydonlaridan foydalanishni optimallashtirish.

Xususiy sherik ruhiy buzilishlardan aziyat chekayotgan, jumladan, nogironligi bo‘lgan shaxslarga mos ishlab chiqarish jarayonini tashkillashtiradi. DIChKda eng ko‘p tavsiya etiladigan mehnat turlari bo‘lib quyidagilar hisoblanadi:

Erkaklar uchun:

duradgorlik, chilangarlik, kartonli-muqovalash, o‘rish, badiiy-amaliy, qishloq xo‘jaligi o‘simlikshunosligi va hayvonshunosligi, binolarni ta'mirlash
va pardozlash va qonunchilik bilan ta'qiqlanmagan boshqa yunalishlar.

Ayollar uchun:

tikish, sun'iy gullar yasash, o‘rish, badiiy-amaliy, qishloq xo‘jaligi o‘simlikshunosligi, hayvonshunosligi va qonunchilik bilan ta'qiqlanmagan boshqa yunalishlar.