Мой сайт

Normativ-huquqiy hujjatlar loyihalari muhokamasi portalida Vazirlar Mahkamasining “Maktabgacha ta'lim muassasalarida sog‘lom ovqatlantirish tizimini takomillashtirish to‘g‘risida”gi qarori loyihasi joylashtirildi.

Hujjatga ko‘ra, prezidentining 2017 yil 9 sentabrdagi PQ-3261-son “Maktabgacha ta'lim tizimini tubdan takomillashtirish chora-tadbirlari to‘g‘risida”gi qaroriga muvofiq O‘zbekiston Respublikasi Maktabgacha ta'lim vazirligi tomonidan Toshkent shahrida joylashgan davlat maktabgacha ta'lim muassasalariga tadbirkorlik sub'yektlari tomonidan tayyor ovqatlarni yetkazib berish bo‘yicha o‘tkazilgan eksperiment natijalari vazirlik, jamoatchilik va ota-onalar tomonidan ijobiy baholangan.

Belgilab qo‘yilishicha: 2019 yil 1 yanvardan boshlab:

davlat maktabgacha ta'lim muassasalari bosh oshpazi, oshpazi va oshxona ishchilari, oziq-ovqat omborlari mudirlari lavozim maoshlariga 100 foiz qo‘shimcha to‘lov joriy etilishi mumkin;

ovqatlantirish autsorsing usulida tashkil etiladigan maktabgacha ta'lim muassasalarining oshxonalarida ishlatiladigan kommunal xizmatlar (elektr energiyasi, suv, gaz) xarajatlari byudjyet mablag‘lari hisobidan qoplanadi;

maktabgacha ta'lim muassasalarida tayyor taomlarni yetkazib berish orqali sog‘lom ovqatlantirishni autsorsing usulida tashkil etilganda maktabgacha ta'lim muassasalari oshxonalari va ulardagi barcha jihozlar “nol” qiymatda ijaraga berilishi belgilanadi;

ovqatlantirish autsorsing usulida tashkil etiladigan maktabgacha ta'lim muassasalarida bosh oshpaz, oshpaz va oshxona ishchilarining qisqartirilishi natijasida tejaladigan byudjyet mablag‘lari bevosita maktabgacha ta'lim muassasalari oshxonalarining moddiy-texnik bazasini mustahkamlash tadbirlariga yo‘naltiriladi.

O‘zbekiston Respublikasi Sog‘liqni saqlash vazirligiga:

maktabgacha ta'lim muassasalarining oshxonalari faoliyati xarid qilinayotgan oziq-ovqat mahsulotlari va tayyorlanayotgan taomlar, shuningdek ularda foydalaniladigan texnologik jihozlarning sanitariya qoidalari, normalari va gigiyena normativlariga mosligini, oshxonalar xodimlarining sanitariya-gigiyena tadbirlari va epidemiyaga qarshi tadbirlar bajarilishiga rioya etishini aniqlash yuzasidan tasdiqlangan grafik asosida har oyda bir marta davlat, nodavlat, xususiy davlat sherikchiligi asosida faoliyat yuritayotgan barcha maktabgacha ta'lim muassasalarida sanitariya nazorat ishlarini o‘tkazish;

ikki oy muddatda Maktabgacha ta'lim vazirligi bilan hamkorlikda maktabgacha ta'lim muassasalari tarbiyalanuvchilarini oziq-ovqat mahsulotlari bilan ta'minlashni belgilovchi sanitariya qoidalari, normalari va gigiyena normativlarini qayta ko‘rib chiqish va bunda tayyorlanayotgan taomlar texnologiyasi, taomning tarkibiy qismlari, vazni, to‘yimliligi, kaloriyasidan kelib chiqib tuzilgan mavsumiy taomnomalar asosida qayta tasdiqlash vazifalari yuklatilishi mumkin.

O‘zbekiston Respublikasi Oliy va o‘rta maxsus ta'lim vazirligi Iqtisodiyot vazirligi bilan birgalikda 2019-2020 o‘quv yilidan boshlab oliy ta'lim muassasalarida “Umumiy ovqatlanish texnologiyasi va uni tashkil etish” yo‘nalishi bo‘yicha oliy ma'lumotli mutaxassislarni tayyorlash va qayta tayyorlash tizimini yo‘lga qo‘yishi mumkin.

O‘zbekiston Respublikasi Maktabgacha ta'lim vazirligi:

2019 yilning 1 yanvaridan vazirlikning tuzilmasiga xodimlarning belgilab qo‘yilgan cheklangan umumiy soni doirasida besh kishilik shtat birligidan iborat maktabgacha ta'lim muassasalarida sog‘lom ovqatlantirishni tashkil etish boshqarmasini tashkil etadi;

Respublikaning barcha tuman(shaxar) maktabgacha ta'lim bo‘limlari shtat jadvallariga sog‘lom ovqatlantirish masalalari bilan shug‘ullanuvchi mutaxassislar shtat birliklari ajratadi;

davlat maktabgacha ta'lim muassasalari tomonidan ovqatlantirish tashkil etilganda oshpazlar va oshpaz yordamchilarining har uch yilda bir marta malakasini oshirish ishlarini tashkil etadi;

xorijiy va mahalliy tadbirkorlik sub'yektlari tomonidan autsorsing usulida ovqatlantirishni tashkil etish bo‘yicha xizmat ko‘rsatish haqida takliflar qonunchilikda belgilangan tartibda amalga oshiriladi.

Maktabgacha ta'lim muassasalarida tarbiyalanuvchilarining sog‘lom va xavfsiz ovqatlantirishni muassasa tomonidan tashkil etish to‘g‘risidagi nizomga ko‘ra, maktabgacha ta'lim muassasalarida sog‘lom va xavfsiz ovqatlantirishni tashkil etishning asosiy maqsadi tarbiyalanuvchilarning sog‘lom va barkamol o‘sishini ta'minlash, oshxonalarda sifatli taomlar tayyorlash, taomlarni iste'mol qilish uchun gigiyenik talablarga muvofiq sharoitlar yaratish hisoblanadi.

Quyidagilar muassasalarda sog‘lom va xavfsiz ovqatlantirishni tashkil etishning asosiy vazifalari hisoblanadi:

tarbiyalanuvchilarning belgilangan sanitariya qoidalari, normalari va gigiyena normativlariga muvofiq holda ovqatlantirishni tashkil etish;

tarbiyalanuvchilarni sifatli oziq-ovqat mahsulotlari bilan ta'minlash;

oziq-ovqat mahsulotlari hamda taomlarning xavfsizligi va sifatini kafolatlash;

tarbiyalanuvchilarda ovqatlantirish bilan bog‘liq yuqumli kasalliklarning tarqalishiga yo‘l qo‘ymaslik;

tarbiyalanuvchilar o‘rtasida sog‘lom ovqatlantirish ko‘nikmalarini shakllantirish;

taomlarni tayyorlashda, oziq-ovqat mahsulotlarini qabul qilish hamda saqlashda sanitariya qoidalari, normalari va gigiyena normativlariga qat'iy rioya etish.

Quyidagilar muassasalarda sog‘lom va xavfsiz ovqatlantirishni tashkil etishga qo‘yiladigan asosiy talablar hisoblanadi:

tarbiyalanuvchilarning sog‘lom va xavfsiz ovqatlantirishni tashkil etishni bevosita maktabgacha ta'lim muassasalari tomonidan amalga oshirish;

tarbiyalanuvchilar uchun sog‘lom va xavfsiz ovqatlantirishni ularning xavfsiz ovqatlantirishni tashkil etishga doir sanitariya-gigiyena tadbirlari va epidemiyaga qarshi tadbirlar bajarilishiga qat'iy rioya qilgan holda amalga oshirish;

tarbiyalanuvchilarning sog‘lom va xavfsiz ovqatlantirishni tashkil etish uchun tegishli tuman (shahar) hokimlari, tuman (shahar) maktabgacha ta'lim bo‘limlari mudirlari hamda maktabgacha ta'lim muassasalari rahbarlari mas'ul hisoblanadi.

Oshxonalarda sog‘lom va xavfsiz ovqatlantirishni tashkil etish tarbiyalanuvchilarning fiziologik yoshiga muvofiq ravishda tuzilgan taomnoma asosida amalga oshiriladi.

Bunda: 

tuman (shahar) maktabgacha ta'lim bo‘limlari hamda Davlat sanitariya epidemiologiya nazorat markazlari tomonidan ishlab chiqilgan namunaviy taomnomalar asosida o‘n kunlik taxminiy taomnomalar oldindan tuziladi;

taomnoma joriy kundagi tarbiyalanuvchilar sonidan kelib chiqib, keyingi ish kuni uchun soat 16.00 ga qadar hamshira tomonidan maktabgacha ta'lim muassasasi oshpazi va ombor mudiri yoki omborchi ishtirokida tuziladi;

taomnoma asosida keyingi kun uchun oziq-ovqat mahsulotlari ombor mudiri yoki omborchi tomonidan hamshira yoki navbatchi tarbiyachi ishtirokida ish kuni tamom bo‘lguniga qadar oshxonaga beriladi;

taomnoma bir kun oldingi tarbiyalanuvchilar soniga mutanosib ravishda har bir tarbiyalanuvchi uchun bir kunlik o‘rtacha sarflanadigan oziq-ovqat mahsulotlari miqdori va ularning qiymati chiqarilgan holda, ikki nusxada tuziladi;

joriy kunda ertalab soat 9.00 ga qadar maktabgacha ta'lim muassasasiga kelgan tarbiyalanuvchilar soni taomnomada nazarda tutilgan tarbiyalanuvchilar sonidan 10 nafar va undan yuqori miqdorda farq qilgan taqdirda, guruh tarbiyachilarining tarbiyalanuvchilar soni to‘g‘risidagi bildirishnomalari asosida taomnomaga o‘zgartirish kiritilishi to‘g‘risida dalolatnoma tuziladi va sanitariya qoidalari, normalari va gigiyena normativlarida belgilangan tartibda mahsulotlar omborga qaytariladi;

taomnoma sanitariya qoidalari, normalari va gigiyena normativlari asosida to‘g‘ri tuzilganligi hamshira va maktabgacha ta'lim muassasasi rahbari tomonidan imzo bilan tasdiqlanadi;

taomnomaning bitta nusxasi hamshiraga, ikkinchi nusxasi oshxonaga foydalanish uchun beriladi;

kunlik tayyorlanadigan taom turlari va bir tarbiyalanuvchi uchun taom miqdori maxsus ovqat tarqatish joyiga yozib qo‘yiladi;

tarbiyalanuvchilar uchun taomlar ovqatlanish texnologiyasi qoidalariga amal qilgan holda tayyorlanadi, saqlanadi va tarqatiladi;

taomnoma oziq-ovqat mahsulotlari turlarini ketma-ketlikda yozish orqali shakllantiriladi, bunda oziq-ovqat mahsulotlari turlari non bilan boshlanib, tuz bilan tugatiladi.